徐家五小寶。柑喜芘琳珞之生活記: 6月 2007

2007年6月28日星期四

又再擔心....

唉....呢幾日柑喜媽冇都咩心機
咩都唔想做...唔想理....
事關柑柑大少尿道炎有好轉之後.......
佢....而家卻冇大便.....
已經第4日啦

星期二,三,四....足3日冇痾過大便

今日已經係第4日啦....如果再冇大便...
柑柑又要返去再睇醫生
又要出多次街,又要再受驚嚇....
我....好心痛呀

30/6 UPDATE
今朝7點左右,我餵完柑喜食早餐之後
柑柑終於便便啦~
便便得好靚,冇爛,一條條
柑喜媽興奮到同柑柑o既便便影左張相
多謝大家呢個星期o既關心同支持呀

2007年6月26日星期二

柑柑病況update

好多謝大家對我o既關心
就等我同大家update下我o既情況啦...

喜:哥哥尋晚比媽咪帶左去睇醫生....
半夜先返黎,仲開左罐罐比我地食.....

柑:媽咪,貓地唔舒服呀......
墨:柑柑乖仔,你要快d好返呀,乖乖地飲多d水

請大家原諒我雖然比較噁心左少少,呢d就係柑柑今朝早痾o既小便
我實在太開心啦~尿量都算係幾多呢^^

喜:媽咪都傻o既,尿尿都好影一餐

喜:哥哥你點呀,好返d未呀~
柑:我覺得好返d啦,頭先又尿尿多一次,進展都幾好呀

墨:頭先診所終於打電話比我啦~
話柑柑o既小便冇血冇結晶,都算唔錯
只要keep住食埋d藥藥,飲多d水水,食罐罐一星期(呢個柑柑同細佬都幾開心)
柑喜媽為左令柑柑飲多d水,就聽醫生o既建議,整個噴泉式水兜比柑柑(本來醫生話買,但係一時之間搵唔到)不過柑喜仲係有少少驚新水兜,希望佢地快d鍾意啦,再唔飲我就會考慮買專用o既飲水機比柑喜,只求佢地乖乖飲多d水
而繼今朝果篤之後,頭先(8.00 p.m.)柑柑又再痾多一次尿尿啦尿量都唔少呢~
報告到呢度先...再一次多謝大家o既關心

2007年6月25日星期一

連夜就醫

柑柑尋晚臨訓果陣(大約係12.00am左右)
突然好好煩躁咁出入貓廁所,又冇大小便
我起先以為佢肚仔痛...因為佢之後有少少大便...
但係便便完之後都仲好炆.....
又再次不停出入貓廁所....痾唔出仲想o係佢張貓床同我張床上面擺出想小便o既姿勢..
平時柑柑係唔會咁樣o既,所以我知...佢一定係唔舒服,病左

我即刻打電話問一位做獸醫助護o既朋友,佢一聽就同我講,貓貓痾唔到小便係好大件事
如果膀胱儲滿尿尿,而佢又痾唔到出黎,係會中尿毒,有生命危險

建議我即刻帶柑柑去睇急診....
我聽完之後,差d喊到收唔到聲

手滕腳震咁book急診,帶柑柑去睇醫生
終於o係大約凌晨一點o既時候去到診所
好好彩醫生一摸完佢肚仔就同我講,膀胱入面冇小便,我鬆返少少(至少冇生命危險)

之後醫生同我講:
1.屋企最近有冇咩改動,令佢情緒不安??(有可能會有影響)
2.佢地平時食d咩??屋企係咪得佢一隻貓??
3.咁o既情況出現左幾耐??

最近屋企都冇咩改動...就得柑柑喜喜兩個,由細玩到大(所以唔係有新貓加入影響)
早兩日係洗完白白,不過之後我都即刻氹返佢,佢都同我玩得好開心
尋晚臨病之前,佢仲同喜喜玩打交,係11.45-12.30左右先不停出入廁所...
平日食天然乾糧,再一貓加1/4個罐罐

醫生聽完之後話:
我做得o岩,男仔貓要吸收多d水份(日日食罐罐係好事)
短時間內帶佢睇醫生(唔係的話,膀胱o既尿尿痾唔到會中尿毒)
佢建議我:
黎緊o既一星期內,餵佢食全罐罐(儘量吸收多d水份)
留小便,帶返黎比佢地check下(確定係咩原因令佢病)
想儘辦法令佢飲多d水(好返之後都要)
繼續留意佢o既小便情況,再痾唔到就要再返去睇

醫生仲柑柑打左針(令佢放鬆d,等佢易d小便)
問左d藥,叫我o係呢幾日內收集佢o既小便比佢地check

我返到屋企,餵左罐罐,藥藥
但係到而家柑柑都未有小便,真係好擔心呀
大家有冇人有經驗,可唔可以教下我點做....我真係好驚好擔心
柑柑你要快d好返呀....你好返媽咪咩都比哂你....你唔好嚇我呀

26/6 11.20 a.m. 更新
阿柑痾左小便啦
仲好大篤添
我而家就拎出去診所比人驗啦
返黎再update柑柑o既進展~~